Utforskande og ambisiøs matematikkundervisning
Utforskande ambisiøs matematikkundervisning tar sikte på å leggje til rette for ein meir praktisk retta og fysisk aktiv tilnærming. Målet er å utvikle elevane si forståing, engasjement og evne til å rekne, anvende og resonnere innan matematikk.
Ambisiøs matematikkundervisning byggjer på forsking dei siste tretti åra, der utforskande arbeidsmetodar er sentrale for elevane sin læring. I praksis inneber dette at læraren set opp læringsmål, men gjev elevane fridom til å utforske problem og finne mønster og system. Elevane deltek aktivt i matematisk utforsking og diskuterer løysingsstrategiar med kvarandre. Feil vert rekna som ein naturleg del av læreprosessen, og elevane oppdagar at matematikk ikkje berre handlar om å hugse informasjon, men om utforsking på deira eigne premissar. (Ghousseini et. al., 2015)
Fire sentrale prinsipp for utforskande ambisiøs matematikkundervisning:
Matematikk som gir meining: Læraren søkjer å forstå korleis matematiske tema kan gi meining for elevane, førebur aktivitetar som gir ansvar for seriøs matematikk, og gjev elevane høve til å resonnere.
Deltaking og likeverdig tilgang: Undervisninga skal gi alle elevane høve til å arbeide med matematiske utfordringar, og alle skal ha likeverdig tilgang til læring. Læraren tar utgangspunkt i at alle elevane er i stand til ambisiøs læring og tilpassar undervisninga deretter.
Tydelege læringsmål: Læraren planlegg og gjennomfører aktivitetar med tydelege læringsmål knytt til sentrale idear i matematikken og er godt kjent med det matematiske innhaldet for å kunne hjelpe elvane i læringa.
Kunnskap om elevane som lærande: Læraren kjenner elevane sine styrkar, vanar og problem, samt deira individuelle tilnærming til læring.Samarbeid i fysisk aktiv læring
Kjenneteikn på ambisiøs matematikkundervisning inkluderer oppgåver som krev utforsking, resonnering og problemløysing. Vektlegg samarbeid og matematiske samtalar og utfordre elevane til å finne eigne løysingsstrategiar og samanlikne dei ulike strategiane. Vis respekt for elevane sine faglege innspel for at dei skal føle seg trygge, og verdsette feil som ein naturleg del av læreprosessen, som også kan bidra til å utvikle elevane si forståing. (Torkildsen, 2020)
Praktiske implikasjoner
For læraren inneber ambisiøs matematikkundervisning kontinuerleg utvikling av sin undervisningspraksis, med fokus på fire sentrale praksisar: presentere oppgåva, bruke matematiske representasjonar, leggje til rette for matematiske samtalar og leie undervisninga mot læringsmåla. (Liljedahl, 2016). Praktisk tilrettelagd undervisning bidreg til å støtte elevane si læring ved at læraren nyttar ulike strategiar og rutinar og undervisningspraksisen bør tilpassast jamleg i tråd med samfunnsendringar og ny forsking.
Referanser
Hala Ghousseini, Heather Beasley & Sarah Lord (2015). Investigating the Potential of Guided Practice With an Enactment Tool for Supporting Adaptive Performance, Journal of the Learning Sciences, 24:3, 461-497.
Liljedahl, P. (2016). Building thinking classrooms: Conditions for problem solving. In P. Felmer, J. Kilpatrick, & E. Pekhonen (eds.) Posing and Solving Mathematical Problems: Advances and New Perspectives. New York, NY: Springer. [ResearchGate, Academia]
Torkildsen, S.H. (2020). Praksiser i ambisiøs matematikkundervisning. Matematikksenteret
